പൂപ്പാറയിൽ ടോറസ് ലോറിയിൽ കഞ്ചാവ് കടത്തിയ കേസിൽ ഓടി രക്ഷപെട്ട പ്രതിയെ ഇടുക്കി സ്‌പെഷ്യല്‍ സ്ക്വാഡ് തൃശ്ശൂരിൽ നിന്നും പിടികൂടി
പത്തര കിലോ കഞ്ചാവ് ടോറസ് ലോറിയില്‍ കടത്തി കൊണ്ട് വന്ന കേസില്‍ ഒളിവില്‍ കഴിഞ്ഞിരുന്ന പ്രതിയെ ഇടുക്കി സ്‌പെഷ്യല്‍ സ്ക്വാഡ് തൃശ്ശൂരില്‍ നിന്ന് അറസ്റ്റ് ചെയ്തു. അടിമാലി മാങ്കടവ് സ്വദേശി പെരുമാപ്പറമ്പില്‍ വീട്ടില്‍ ഷൈബി എന്ന് വിളിക്കുന്ന ഷൈമോന്‍ തോമസ് ആണ് പിടിയിലായത്. നിരവധി കഞ്ചാവ് കേസുകളിലെയും പ്രതിയാണ് ഷൈബി. കഴിഞ്ഞ ഓഗസ്റ്റ് മാസമാണ് കേസിനാസ്പദമായ സംഭവം. ഒഡീഷയിൽ നിന്നും കടത്തിക്കൊണ്ടുവന്ന പത്തര കിലോ കഞ്ചാവ് വാഹന പരിശോധനയിൽ എക്‌സൈസ് സംഘം കണ്ടെത്തുകയായിരുന്നു.
സംഭവത്തിൽ രാജാക്കാട് ചെറിപുരം രുക്മിണി നിവാസ് വീട്ടിൽ അഭിജിത്ത്(31) രാജാക്കാട് പുല്ലാർക്കാട്ടിൽ വീട്ടിൽ അനീഷ് (49) എന്നിവരെ അറസ്റ്റ് ചെയ്തെങ്കിലും മൂന്നാം പ്രതിയായ ഷൈബി സംഭവ സ്ഥലത്തു നിന്നും ഓടി രക്ഷപെടുകയായിരുന്നു. ഷൈബിക്കായുള്ള തിരച്ചിൽ എക്‌സൈസ് സംഘം ഊർജിതമാക്കിയിരുന്നു. തുടർന്ന് ത്രിശ്ശൂരിൽ ഒളിവിൽ കഴിഞ്ഞിരുന്ന പ്രതിയെ ഇടുക്കി സ്പെഷ്യൽ സ്ക്വാഡ് അറസ്റ്റ് ചെയ്യുകയായിരുന്നു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
.jpeg)
