കട്ടപ്പന നഗരസഭാ പതിനൊന്നാം വാർഡിൽ ഉൾപ്പെട്ട കൊച്ചുതോവാള നോർത്ത്, ചെരുവിൻ പടി മേഖലയിലെ ഇരുപതോളം കുടുംബങ്ങളുടെ യാത്രാദുരിതത്തിനാണ് പരിഹാരം ആയിരിക്കുന്നത്. മേഖലയിലെ തോടിന് കുറുകെ പാലം ഇല്ലാതിരുന്നതിനാൽ അയൽവാസിയുടെ പുരയിടത്തിലൂടെയായിരുന്നു പതിറ്റാണ്ടുകളായി പ്രദേശവാസികൾ യാത്ര ചെയ്തിരുന്നത്.

ജനങ്ങളുടെ ദുരവസ്ഥ ചൂണ്ടിക്കാട്ടി മന്ത്രി റോഷി അഗസ്റ്റിന് നാട്ടുകാർ പരാതി നൽകിയിട്ടും നടപടി ഉണ്ടായില്ല. ഇതോടെയാണ് നഗരസഭയുടെ നേതൃത്വത്തിൽ പാലം നിർമ്മിക്കാൻ ശ്രമം ആരംഭിച്ചത്. അഞ്ചുലക്ഷം രൂപ നൽകി സമീപവാസിയുടെ സ്ഥലം വാങ്ങിയശേഷം , നഗരസഭ വികസന ഫണ്ടിൽ നിന്നും 4 ലക്ഷം രൂപയും മെയിന്റനൻസ് ഫണ്ടിൽ നിന്ന് രണ്ടര ലക്ഷം രൂപയും മുടക്കിയാണ് ഇവിടെ പാലം നിർമ്മിച്ചത്.

നഗരസഭ പൊതുമരാമത്ത് സ്റ്റാൻ്റിംഗ് ചെയർമാൻ സിബി പാറപ്പാ യിയുടെ നേതൃത്വത്തിലാണ് പാലം നിർമ്മാണം പൂർത്തിയാക്കിയത്. നഗരസഭ ചെയർപേഴ്സൺ ബീന ടോമി പാലത്തിന്റെ ഉദ്ഘാടനം നിർവഹിച്ചു.പാലത്തിന്റെ ഇരുവശത്തെയും പാത കോൺക്രീറ്റ് ചെയ്യാനായി 6 ലക്ഷം രൂപയും അനുവദിച്ചു. ജനപ്രതിനിധികളും , നാട്ടുകാരും അടക്കം നിരവധി ആളുകൾ ഉദ്ഘാടന പരിപാടിയിൽ പങ്കെടുത്തു. ടിക്സൺ പനക്കച്ചിറ , ബിജിത്ത് ചെറുവിൽ,ബിജു ചെറുവിൽ എന്നിവർ നേതൃത്വം നൽകി.