ഏഴാമത് റെയിൻ ഇന്റർനാഷണൽ നേച്ചർ ഫിലിം ഫെസ്റ്റിവൽ കുട്ടിക്കാനം മരിയൻ കോളേജിൽ ആരംഭിച്ചു.ജയരാജ് ഫൗണ്ടേഷനും ഉന്നത വിദ്യാഭ്യാസ വകുപ്പിനു കീഴിലുള്ള നാഷണൽ സർവീസ് സ്കീമും സംയുക്തമായാണ് ഫിലിം ഫെസ്റ്റിവൽ സംഘടിപ്പിക്കുന്നത്.

കുട്ടിക്കാനം മരിയൻ കോളേജ് കമ്യൂണിക്കേഷൻ ആൻഡ് മീഡിയ സ്റ്റഡീസ് വിഭാഗത്തിന്റെയും എൻ എസ് എസ് യൂണിറ്റിന്റെയും നേതൃത്വത്തിൽ നടത്തുന്ന ഏഴാമത് റെയിൻ ഇന്റർനാഷണൽ നേച്ചർ ഫിലിം ഫെസ്റ്റിവൽ മഹാത്മ ഗാന്ധി സർവ്വകലാശാല വൈസ് ചാൻസലർ ഡോ. സി. ടി. അരവിന്ദകുമാർ വൃക്ഷത്തൈ നനച്ച് ഉദ്ഘാടനം ചെയ്തു.  

പുതുതലമുറയിൽ നിന്നും അന്യമായിക്കൊണ്ടിരിക്കുന്ന പ്രകൃതി സ്നേഹവും പരിസ്ഥിതി സംരക്ഷണവും തിരികെ കൊണ്ടു വരുവാനുള്ള പരിശ്രമമാണ് ഇത്തരം ഫിലിം ഫെസ്റ്റിവൽ കൊണ്ട് ഉദ്ദേശിക്കുന്നതെന്ന് സിനിമ സംവിധായകൻ ജയരാജ് പറഞ്ഞു. 

പ്രകൃതി, പരിസ്ഥിതി സംരക്ഷണം എന്നിവ മുഖ്യവിഷയമാക്കിയുള്ള സിനിമകളാണ് മേളയിൽ പ്രദർശിപ്പിക്കുന്നത്. ചലച്ചിത്ര മേളയോടനുന്ധിച്ച് വിവിധ തരത്തിലുള്ള ക്യാമറകളുടെയും പ്രകൃതി ചിത്രങ്ങളുടെയും പ്രദർശനവും ഒരുക്കിയിട്ടുണ്ട്. പ്രകൃതിയുമായി ഇഴചേർന്നുനിൽക്കുന്ന സൈലന്റ് വാലി, ബൈസൻ വാലി, കുറിഞ്ഞിമല, ചോലമല, നിള, പെരിയാർ എന്നീ പേരുകൾ നല്കിയ വേദികളിലായാണ് സിനിമ പ്രദർശനവും എക്സിബിഷനും നടക്കുക. വിവിധ ഇടങ്ങളിൽ നിന്നായി അഞ്ഞൂറിലധികം വിദ്യാർഥികൾ മേളയിൽ പങ്കെടുക്കുന്നു. രാജ്യാന്തര ചലച്ചിത്രങ്ങൾക്കൊപ്പം വിദ്യാർത്ഥികൾ നിർമിച്ച നൂറ്റി മുപ്പതിലധികം ഹ്രസ്വചിത്രങ്ങളുടെയും പ്രദർശനം നടന്നു.