ശബരിമല തീർത്ഥാടന കാലത്തെ അപകടങ്ങൾക്ക് അറുതി വരുത്താൻ നടപടിയുമായി മോട്ടോർ വാഹന വകുപ്പിന്റെ സേഫ് സോൺ പദ്ധതി.തീർത്ഥാടന കാലത്ത് ഏറ്റവും കൂടുതൽ അപകടം ഉണ്ടാകുന്ന മുണ്ടക്കയം മുതൽ കുട്ടിക്കാനം വരെയുള്ള പാതയിൽ വിവിധ ഇടങ്ങളിൽ പരിശോധനകൾ കർശനമാക്കി.രാത്രി സമയങ്ങളിൽ വരുന്ന അയ്യപ്പ ഭക്തർക്ക് വേണ്ട നിർദ്ദേശങ്ങളും നൽകുന്നു. ശബരിമല തീർഥാടന കാലത്തെ റോഡ് സുരക്ഷ മുൻനിർത്തി മോട്ടോർ വാഹന വകു ൻ്റെ നേതൃത്വത്തിലാണ് സേഫ് സോൺ പദ്ധതി നടപ്പിലാക്കുന്നത്. ഇടുക്കി ജില്ലയിൽ പീരുമേട്,കുട്ടിക്കാനം എന്നിവിടങ്ങൾ കേന്ദ്രമാക്കിയാണ് പ്രവർത്തനം.

ശബരിമല തീർഥാടകർ കടന്നു പോകുന്ന പ്രദേശത്തെ റോഡുകളെ ആറായി തിരിച്ചാണ് പദ്ധതി നടപ്പിലാക്കുന്നത്. 24 മണിക്കുറും പ്രവർത്തിക്കുന്ന സേഫ് സോൺ പദ്ധതി വഴി റോഡ് സുരക്ഷ ഉറപ്പാക്കാനും തീർത്ഥാടകർക്ക് മാർഗനിർദ്ദേശങ്ങൾ നൽകുന്നതിനും ലക്ഷ്യമിടുന്നു. ഇതിനായി 24 മോട്ടോർ വാഹന വകുപ്പുദ്യോഗസ്ഥർ ആറു വാഹനങ്ങളിലായി മേഖലയിൽ ഉണ്ടാകും.

മാർഗ്ഗ നിർദ്ദേശങ്ങളടങ്ങിയ ലഘുലേഖകൾ, വാഹനങ്ങളിൽ പതിപ്പിക്കുന്ന സ്റ്റിക്കറുകൾ തുടങ്ങിയവ വിതരണം ചെയ്യും.മുഴുവൻ സമയവും സഹായങ്ങൾ ലഭ്യമാക്കുന്നതിന് ഹെൽപ്പ് ലൈൻ നമ്പറുകൾ തീർത്ഥാടകർക്ക് കൈമാറും. റോഡിൽ തകരാറിലാകുന്ന വാഹനങ്ങൾക്കായി മൊബൈൽ വർക്ഷോപ്പും ക്രയിൻ സംവിധാനവും ഒരുക്കും. അപകടത്തിൽ പെടുന്നവരെ ആശുപത്രികളിലെത്തിക്കാൻ ആംബുലൻസ് സൗകര്യവും പദ്ധതിയുടെ ഭാഗമായി സജ്ജമാണ്. ശബരിമല സീസൺ ആരംഭിച്ചതിനു ശേഷം തീർത്ഥാടകരുടെ നിരവധി വാഹനങ്ങൾ അപകടത്തിൽപ്പെട്ടതോടെ സുരക്ഷ കൂടുതൽ ശക്തമാക്കാനാണ് തീരുമാനം.