.jpg)
.jpg)
.jpg)
മുല്ലപ്പെരിയാര്‍ - രാഷ്ട്രീയ നേട്ടത്തിന് ആശങ്ക പ്രചരിപ്പിക്കരുത് : എല്‍.ഡി.എഫ്
മുല്ലപെരിയാര്‍ പ്രശ്നത്തില്‍ താല്‍ക്കാലിക രാഷ്ട്രീയ നേട്ടത്തിന് വേണ്ടി ആശങ്ക വിതച്ച് ജനങ്ങളെ പരിഭ്രാന്തരാക്കുന്ന നടപടികളില്‍ നിന്നും ഉത്തരവാദിത്വപ്പെട്ടവര്‍ പിന്‍മാറണമെന്ന് എല്‍ഡിഎഫ് ഇടുക്കി ജില്ലാ കമ്മിറ്റി വാര്‍ത്താ കുറിപ്പില്‍ പറഞ്ഞു. മുല്ലപ്പെരിയാര്‍ പ്രശ്നം വൈകാരികത ഇളക്കിവിട്ട് രണ്ട് സംസ്ഥാനത്തെ ജനങ്ങളെ ഭിന്നിപ്പിച്ച് പരിഹരിക്കാന്‍ കഴിയുന്നതല്ല.
നയതന്ത്രജ്ഞതയോടെയും സമഭാവനയോടെയും നിയമപരമായും രാഷ്ട്രീയമായും പരിഹാരം കാണേണ്ടതാണ്. സുപ്രീംകോടതിയുടെ പരിഗണനയില്‍ നില്‍ക്കുന്ന വിഷയത്തില്‍ നിയമപരമായ പരിഹാരമാണ് ഉണ്ടാകേണ്ടത് അതോടൊപ്പം പാര്‍ലമെന്‍റിനകത്തും പുറത്തും രാഷ്ട്രീയ പരിഹാരത്തിനുളള നടപടികള്‍ വേഗത്തിലാക്കുകയും വേണം. രണ്ട് സംസ്ഥാനങ്ങള്‍ തമ്മിലുളള ഉഭയകക്ഷി ചര്‍ച്ചകളുടെ സാധ്യതകളും സര്‍ക്കാര്‍ തേടുകയാണ്.
2016 ല്‍ പിണറായി സര്‍ക്കാര്‍ അധികാരത്തില്‍ വന്നപ്പോള്‍ മുതല്‍ സ്വീകരിച്ച് വരുന്ന നിലപാട് കേരളത്തിന് സുരക്ഷ തമിഴ്നാടിന് വെളളം എന്നുളളതാണ്. മുല്ലപെരിയാറില്‍ പുതിയ ഡാം നിര്‍മ്മിക്കണമെന്നതാണ് കേരള സര്‍ക്കാരിന്‍റെ നിലപാട്.അതിനോട് രാഷ്ട്രീയ ഭേദമന്യേ മുഴുവന്‍ പേരും യോജിക്കുകയുമാണ്.
എന്നാല്‍ പുതിയ ഡാം എന്ന നിര്‍ദ്ദേശവും പാരിസ്ഥിതിക അനുമതിയും നിര്‍മ്മാണചിലവും സംബന്ധിച്ച കാര്യങ്ങളില്‍ ധാരണയും നിയമപരമായ അംഗീകാരവും ഉണ്ടാകേണ്ടതുണ്ട്. ഇക്കാര്യത്തില്‍ വേഗത്തില്‍ തീരുമാനം ഉണ്ടാക്കാന്‍ സര്‍ക്കാര്‍ മുന്‍കയ്യെടുത്ത് ശക്തമായ ഇടപെടലുകള്‍ നടത്തുകയാണ്. സുപ്രീം കോടതിയില്‍ നിലനില്‍ക്കുന്ന കേസിന്‍മേല്‍ കാലവിളമ്പം കൂടാതെ തീരുമാനം ഉണ്ടാകാന്‍ സാധിക്കേണ്ടതുണ്ട്. കേന്ദ്രസര്‍ക്കാരും പാര്‍ലമെന്‍റും ഇക്കാര്യത്തില്‍ ശാശ്വത പരിഹാരത്തിനായി ആത്മാര്‍ത്ഥമായി ഇടപെടണം.
കേരളത്തിന്‍റെ സുരക്ഷക്ക് വേണ്ടിയും തമിഴ് ജനതക്ക് ജലം ലഭ്യമാകുന്നതിനും പാര്‍ലമെന്‍റിനെ പോരാട്ടവേദിയാക്കാന്‍ മെമ്പര്‍മാര്‍ക്ക് കഴിയണം .നിര്‍ഭാഗ്യവശാല്‍ കഴിഞ്ഞ 5 വര്‍ഷവും കേരളത്തിലെ എം.പിമാര്‍ ഇക്കാര്യത്തില്‍ കാര്യക്ഷമായ ഒരു ഇടപെടലും നടത്തിയില്ല. ഇപ്പോള്‍ ജനങ്ങള്‍ക്കിടയില്‍ ആശങ്ക പരത്താന്‍ നോക്കുന്നത് അംഗീകരിക്കാന്‍ കഴിയുന്നതല്ല.
ഇത്തരക്കാരുടെ പിന്തുണയോടെ സമൂഹ്യ മാധ്യമങ്ങളിലൂടെ വിവാദം ഉണ്ടാക്കുന്ന നീക്കങ്ങളെ തടയാന്‍ ജില്ലാ ഭരണകൂടം തയ്യാറാകണം. നിലവിലെ കാലാവസ്ഥയില്‍ മാറ്റം ഉണ്ടായാല്‍ മുല്ലപ്പെരിയാര്‍ താഴ്വരയിലെ ജനങ്ങളുടെ പൂര്‍ണ്ണമായ സുരക്ഷ ഉറപ്പ് വരുത്താന്‍ അടിയന്തിര നടപടികള്‍ മുന്‍കൂട്ടി സ്വീകരിക്കണമെന്നും എല്‍ഡിഎഫ് നേതൃത്വം ആവശ്യപ്പെട്ടു.
ഇടുക്കിയില്‍ ചേര്‍ന്ന എല്‍ഡിഎഫ് യോഗത്തില്‍ കണ്‍വീനര്‍ കെ.സലീം കുമാര്‍ അദ്യക്ഷത വഹിച്ചു. നേതാക്കളായ സി.വി വര്‍ഗ്ഗീസ് ,ജോസ് പാലത്തിനാല്‍, അഡ്വ.കെ.റ്റി മൈക്കിള്‍, കെ.എം റോയ് , കോയ അമ്പാട്ട്, ജോണി ചെരുവുപറമ്പില്‍ , രതീഷ് അത്തിക്കുഴിയില്‍, സി.എം അസീസ്സ്, സിബി മൂലേപ്പറമ്പില്‍ കെ.എം ജബ്ബാര്‍, എന്നിവര്‍ സംസാരിച്ചു.
