ഇടുക്കി ജില്ലാ കേരളാബാങ്ക് എംപ്ലോയീസ് കോ-ഓപ്പറേറ്റീവ് സൊസൈറ്റി സുവര്‍ണ്ണ ജൂബിലി ആഘോഷങ്ങളുടെ ഭാഗമായി നിര്‍മ്മിച്ച സ്നേഹഭവനത്തിന്‍റെ താക്കോല്‍ദാനം കേരളാ ജല വിഭവ വകുപ്പ് മന്ത്രി ശ്രീ. റോഷി ആഗസ്റ്റിന്‍ തങ്കമണിയില്‍ നിര്‍വ്വഹിച്ചു സൊസൈറ്റി അംഗങ്ങളുടെയും മുന്‍ അംഗങ്ങളുടെയും കുട്ടായ്മയിലാണ് സ്നേഹഭവനം നിര്‍മ്മിച്ചത്.

 1974 മുതല്‍ ഇടുക്കി കോളനി കേന്ദ്രമാക്കി പ്രവര്‍ത്തിക്കുന്ന സംഘത്തിന്‍റെ സുവര്‍ണ്ണജൂബിലി ഒരു വര്‍ഷം നീണ്ടു നില്‍ക്കുന്ന പരിപാടികളോടെ ആഘോഷിക്കുകയാണ്. ജൂബിലി വര്‍ഷം പ്രമാണിച്ച് സംഘത്തിന്‍റെ സേവനം പൊതുജനങ്ങള്‍ക്ക് കൂടി ലഭ്യമാകുന്ന വിധം വിപുലികരിക്കും. ഇടുക്കി കോളനിയിലുള്ള ഹെഡ്ഡോഫീസില്‍ നിന്നും തൊടുപുഴ ബ്രാഞ്ചില്‍ നിന്നുമായി പത്തു കോടി രൂപാ പൊതുജനങ്ങള്‍ക്ക് സ്വര്‍ണ്ണ പണയ വായ്പയായി നല്‍കുന്നതിനാണ് ലക്ഷ്യമിടുന്നത്.

സഹകരണ മേഖലയിലുള്ള വിശ്വാസ്യത വര്‍ദ്ധിപ്പിക്കുന്നതിനും പ്രസ്ഥാനത്തിന്‍റെ സാമൂഹ്യ പ്രതിബന്ധത ആവര്‍ത്തിച്ച് ഉറപ്പിക്കുന്നതിനും ഇത്തരം സംരഭങ്ങള്‍ക്ക് സാധിക്കും. തങ്കമണി കൂട്ടക്കല്ല് പാതയോരത്ത് നിര്‍മ്മിച്ചിരിക്കുന്ന സ്നേഹഭവനത്തിന്‍റെ അങ്കണത്തില്‍ നടന്ന പരിപാടിയില്‍ കേരളാബാങ്ക് ഡയറക്ടര്‍ ശ്രീ. കെ വി ശശി അധ്യക്ഷത വഹിച്ചു.

ജില്ലാ ആസുത്രണ സമിതി ഉപാധ്യക്ഷന്‍ ശ്രീ. സി വി വര്‍ഗീസ്, കാമാക്ഷി ഗ്രാമപഞ്ചായത്ത് പ്രസിഡന്‍റ് ശ്രീമതി അനുമോള്‍ ജോസ്, കേരളാ ബാങ്ക് ഡെപ്യൂട്ടി ജനറൽ മാനേജർ തോമസ് ജോൺ ഗ്രാമപഞ്ചായത്ത് അംഗങ്ങളായ റെനി റോയി ,ജോസ് തൈച്ചേരി വിവിധ സംഘടനാ നേതാക്കളായ ശ്രീ.സിജോ എസ്, ശ്രീ.കെ. ഡി. അനിൽ കുമാർ ,ശ്രീ .കെ.വി. ജോയി, എ.പി ബേബി, സംഘം പ്രസിഡൻറ് ശ്രീ.സി.ആർ .രാജേഷ് സെക്രട്ടറി കെ ജയചന്ദ്രൻ,ഭരണ സമിതിയംഗങ്ങൾ ,സഹകാരികൾ ജീവനക്കാർ എന്നിവർ പങ്കെടുത്തു.

ചടങ്ങിൽ പങ്കെടുക്കുന്നതിനായി മഹാബലിവേഷത്തിൽ കേരളാ ബാങ്ക് അസി.മാനേജർ ശ്രീ .പി .രാജൻ എത്തിയത് ആകർഷകമായി.   സി.പി.ഐ (എം) ജനറൽ സെക്രട്ടറി ശ്രീ .സീതാറാം യച്ചൂരിയുടെ നിര്യാണത്തെ  തുടർന്ന് ആർഭാടങ്ങൾ ഒഴിവാക്കിയാണ് ചടങ്ങ് നടന്നത്