15 കുട്ടികൾ പഠിക്കുന്ന അങ്കണവാടിയാണ് ഉപ്പുതറ 7-ാം വാർഡിലെ ക്വാർട്ടേഴ്സ് പടി അങ്കണവാടി . ഇവിടെ വാട്ടർ അതോറിറ്റിയുടെ കുടിവെള്ളത്തെ ആശ്രയിച്ചാണ് കുട്ടികളുട പ്രാഥമിക ആവശ്യം നിറവേറ്റുന്നത്. എന്നാൽ കഴിഞ്ഞ 2 മാസമായി ഇവിടെ കുടിവെള്ള ജീവനക്കാർ സമീപ വീട്ടുകളിൽ നിന്നും വെള്ളം തലച്ചുമടായിട്ട് എത്തിച്ചാണ് അങ്കണവാടി  ആവശ്യവും കുട്ടികളുടെ പ്രാഥമികാവശ്യവും നിറവേറ്റുന്നത്. 2 മാസം മുമ്പ് ജലജീവൻ മിഷൻ പൈപ്പിടാൻ കുഴിയെടുത്തപ്പോൾ അങ്കണവാടിയിലേക്കും സമീപത്തെ വീടുകളിലേക്കും വെള്ളമെത്തുന്ന പൈപ്പ് പൊട്ടിച്ചിരുന്നു. ഈ പൈപ്പ് നന്നാക്കിത്തരാമെന്ന് പറഞ്ഞുവെങ്കിലും നടപടി ഉണ്ടായില്ല. കഴിഞ്ഞ രണ്ട് മാസമായി ഈ സ്ഥിതി തുടരുകയാണ്. എന്നാൽ കൃത്യമായി ബില്ല് എത്തിക്കുന്നതിൽ ഒരു വീഴ്ചയും വാട്ടർ അതോറിറ്റി വരുത്തുന്നുമില്ല.

ദിവസേന 100 ലിറ്റർ വെള്ളമെങ്കിലും ലഭിച്ചാൽ മാത്രമെ കുട്ടികളുടെ കാര്യങ്ങൾക്ക് തികയു. ഇത്രയും വെള്ളം തലച്ചുമടായി എടുത്തുകൊണ്ടു വരുന്നതിനുള്ള ബുദ്ധിമുട്ട് സഹിച്ചാണ്   ജീവനക്കാർ വെള്ളം എത്തിക്കുന്നത്. കുടിവെള്ള പ്രശ്നം പരിഹരിക്കാനായി പല തവണ വാട്ടർ അതോറിറ്റിയിയെ സമീപിച്ചു എങ്കിലും യാതൊരുവിധ  നടപടിയും സ്വീകരിച്ചിട്ടില്ല.