വോട്ടെണ്ണൽ ഒരുക്കങ്ങൾ പൂർത്തിയായി : ജില്ലാകളക്ടർ ഷീബാ ജോർജ്

ലോക്‌സഭാ തിരഞ്ഞെടുപ്പ് വോട്ടെണ്ണലിനുള്ള ഒരുക്കങ്ങൾ പൂർത്തിയായതായി ജില്ലാ തിരഞ്ഞെടുപ്പ് ഉദ്യോഗസ്ഥയും ജില്ലാ കളക്ടറുമായ ഷീബാ ജോർജ് അറിയിച്ചു. പൈനാവ് ഏകലവ്യ മോഡൽ റസിഡൻഷ്യൽ സ്കൂളിലാണ് ജില്ലയിലെ വോട്ടെണ്ണൽ നടക്കുക. 

ജൂൺ 4 ന് രാവിലെ 7.30 ന് സ്ട്രോങ്ങ് റൂം തുറക്കും 8 മണിക്ക് തപാൽ ബാലറ്റുകൾ എണ്ണും. 18 ടേബിളുകളിലാണ് തപാൽ വോട്ടുകൾ എണ്ണുക. തുടർന്ന് വോട്ടിംഗ് യന്ത്രങ്ങളിലെ വോട്ടുകൾ എണ്ണിത്തുടങ്ങും. നിയമസഭാ മണ്ഡല അടിസ്ഥാനത്തിൽ ഏഴ് ഹാളുകളിലായി ഒരു ഹാളിൽ 14 ടേബിളുകൾ എന്ന തോതിൽ 98 ടേബിളുകളിലാണ് വോട്ടിങ്ങ് യന്ത്രങ്ങളിലെ വോട്ടെണ്ണൽ നടക്കുക.

വോട്ടെണ്ണൽ കേന്ദ്രത്തിലെ ബാരിക്കേഡ് നിർമ്മാണം , പശ്ചാത്തല , വിനിമയ സംവിധാനങ്ങൾ ഒരുക്കൽ, തുടങ്ങിയവ പൂർത്തിയായി. കൗണ്ടിംഗ് സൂപ്പർവൈസർമാരുടെയും അനബന്ധ ജീവനക്കാരുടെയും നിയമനവും പരിശീലനവും പൂർത്തിയായതായും ജില്ലാ കളക്ടർ അറിയിച്ചു. സുരക്ഷാ ക്രമീകരണങ്ങൾ, മീഡിയാ സെൻ്റർ, പൊതുവായും ഔദ്യോഗിക തലത്തിലുമുള്ള ആശയവിനിമയേ കേന്ദ്രങ്ങൾ, ഏജൻ്റുമാർക്കുള്ള സൗകര്യങ്ങൾ എന്നിവ സജ്ജമായിക്കഴിഞ്ഞു.

 തിരഞ്ഞെടുപ്പ് കമ്മീഷൻ നിയോഗിച്ച രണ്ട് ഒബ്സർവർമാർ കൗണ്ടിംഗ് നടപടികൾ നിരീക്ഷിക്കും. തിരഞ്ഞെടുപ്പ് കമ്മീഷൻ നിർദ്ദേശിച്ച തരത്തിലുള്ള മുഴുവൻ ക്രമീകരണങ്ങളും വോട്ടെണ്ണൽ കേന്ദ്രത്തിൽ ഒരുക്കിയതായി ജില്ലാ കളക്ടർ പറഞ്ഞു.