കട്ടപ്പന: അപൂര്‍വ്വ സംഗമത്തിനാണ്  കട്ടപ്പന ഗവ.ട്രൈബല്‍ ഹൈസ്‌ക്കൂള്‍ വേദിയായത്. അവധി ദിവസമായിരുന്നിട്ടും വര്‍ഷങ്ങള്‍ക്ക് മുമ്പ് ഇവിടെ നിന്ന് പഠിച്ചിറങ്ങിയവര്‍ ആ പഴയ ക്ലാസ് മുറിയില്‍ ഒത്തുകൂടി. അവരുടെ പ്രിയപ്പെട്ട ഗുരുനാഥന്‍ വൈ.സി. സ്റ്റീഫന്‍ രചിച്ച 'ഓര്‍മ്മകളുടെ മുറിപ്പാടുകള്‍' എന്ന പുസ്തകത്തിന്റെ പ്രകാശന ചടങ്ങിന് സാക്ഷ്യം വഹിക്കാനാണ് പൂര്‍വ്വവിദ്യാര്‍ത്ഥികള്‍ എത്തിയത്.

വിവിധ ബാച്ചുകളിലായി പഠിച്ച തന്റെ കുട്ടികള്‍ക്ക് കൈമാറിക്കൊണ്ട് വേണം പുസ്തകത്തിന്റെ പ്രകാശനമെന്ന് വൈ.സി. സ്റ്റീഫന്‍ എന്ന റിട്ട. അദ്ധ്യാപകന്‍ മുന്‍കൂട്ടി നിശ്ചയിച്ചിരുന്നു. കൊല്ലം സ്വദേശിയായ സ്റ്റീഫന്‍ അദ്ധ്യാപക ജോലിക്കായാണ് വര്‍ഷങ്ങള്‍ക്ക് മുമ്പ് ഇടുക്കി ജില്ലയിലേക്ക് വന്നത്. വിവിധ സ്‌കൂളുകളില്‍ മാറിമാറി ജോലി ചെയ്തു. അവസാനം ട്രൈബല്‍ സ്‌കൂളിലെ പ്രധാനാദ്ധ്യാപകനുമായി. സാംസ്‌കാരിക രാഷ്ട്രീയ രംഗത്തും സജീവമായ അദ്ദേഹത്തിന്റെ അന്ന് മുതലുള്ള ഓര്‍മ്മകളാണ് പുസ്തകത്തില്‍ ഉള്‍പ്പെടുത്തിയിരിക്കുന്നത്.

കൈപ്പട പബ്ലീഷിങ് ഗ്രൂപ്പ് പ്രസിദ്ധീകരിച്ച പുസ്തകം അഡ്വ. സേനാപതി വേണു സ്റ്റീഫന്റെ ശിഷ്യന്മാരായ രാജു ജോസ്, ആനി സ്‌റ്റെല്ലാ മേരി ഐസക്, ടിജി. എം. രാജു, സുനില്‍. കെ. കുമാരന്‍ എന്നിവര്‍ക്ക് നല്‍കി പ്രകാശനം ചെയ്തു. ട്രൈബല്‍ സ്‌കൂള്‍ പ്രിന്‍സിപ്പല്‍ മിനി ഐസക് ചടങ്ങില്‍ അദ്ധ്യക്ഷയായി. കവയത്രി സിന്ധു സൂര്യ പുസ്തക പരിചയം നടത്തി. സോജന്‍ സ്വരാജ്, കെ.എസ്. ഫ്രാന്‍സിസ്, ജോര്‍ജ്ജ് ജോസഫ് പടവന്‍, അധ്യാപിക ഷൈബി കെ.കെ, ബിബിന്‍ വൈശാലി എന്നിവര്‍ സംസാരിച്ചു.