പുതുവർഷത്തിൻ്റെ വരവേല്‍ക്കുന്നതിനായി ഒരുങ്ങി ഫോർട്ട് കൊച്ചി. വെളി ഗ്രൗണ്ടിലും പരേഡ് ഗ്രൗണ്ടിലും നിലകൊള്ളുന്ന രണ്ടുപാപ്പാഞ്ഞിമാരും മഞ്ഞ വസ്ത്രത്തില്‍ അലങ്കരിച്ച മനോഹരമായ മഴ മരവും ജനസാഗരത്തോട് ചേർന്ന് കൊച്ചിയിലേക്ക് പുതുവർഷത്തെ സ്വാഗതം ചെയ്യുകയാണ്.പോയ വർഷത്തെ ദു:ഖങ്ങളും പ്രതിസന്ധികളും മറന്ന് പുതിയ പ്രതീക്ഷയോടെയാണ് കൊച്ചി ജനങ്ങള്‍ പുതുവർഷത്തെ വരവേല്‍ക്കുന്നത്.

ഇക്കുറി കൊച്ചിയില്‍ കത്തിക്കുന്നത് രണ്ടുപാപ്പാഞ്ഞിമാരെ, വെളി ഗ്രൗണ്ടില്‍ ഗാല ഡി ഫോർട്ട് കൊച്ചിയുടെ നേതൃത്വത്തില്‍, പരേഡ് ഗ്രൗണ്ടില്‍ കാർണിവല്‍ കമ്മിറ്റിയുടെ നേതൃത്വത്തില്‍. ഇറ്റാലിയൻ കാർണിവലിലെ പപ്പയുടെ മാതൃകയില്‍ നിർമ്മിച്ച ഗാലഡി ഫോർട്ട് കൊച്ചിയുടെ പാപ്പാഞ്ഞി ഇന്ത്യയിലെ തന്നെ ഏറ്റവും വലിയതായി വിശേഷിപ്പിക്കപ്പെടുന്നു. ദു:ഖങ്ങളും സങ്കടങ്ങളും പപ്പയോടൊപ്പം കത്തുകയും ഐശ്വര്യവും സന്തോഷവും നിറഞ്ഞ പുതുവർഷം ജനങ്ങള്‍ക്ക് നല്‍കുമെന്നും വിശ്വാസം ഉണ്ട്.

കേരളത്തിലെ ഏറ്റവും വലിയ പുതുവത്സരാഘോഷമായ ഈ പരിപാടി കാണാൻ ഈ വർഷം മൂന്ന് ലക്ഷത്തിലേറെ പേർ എത്തുമെന്നാണ് കണക്കുകള്‍. ജനസാന്ദ്രത ഉയർന്നതിനാല്‍ അപകട സാധ്യത ഒഴിവാക്കാൻ ഫോർട്ട് കൊച്ചിയില്‍ കർശന സുരക്ഷാ നടപടികള്‍ ക്രമീകരിച്ചിരിക്കുന്നു. പോലീസ്, തിരക്കുള്ള സ്ഥലങ്ങളില്‍ നിയന്ത്രണം ഉറപ്പാക്കുന്നതിന് പ്രത്യേകം ശ്രമിക്കുന്നതോടൊപ്പം, വാഹനങ്ങള്‍ നിയന്ത്രിച്ച സമയങ്ങളില്‍ മാത്രം പ്രവേശനം അനുവദിക്കുന്നതും ഉള്‍പ്പെടുന്നു.

കഴിഞ്ഞ വർഷങ്ങളെക്കാള്‍ കൂടുതല്‍ തിരക്കുള്ളതിനാല്‍, ഉച്ചയ്ക്ക് രണ്ട് മണിക്ക് ശേഷം ആ ഭാഗത്ത് വാഹനങ്ങള്‍ കടത്തിവിടാതെ കർശന നിയന്ത്രണങ്ങള്‍ ഏർപ്പെടുത്തിയിരിക്കുന്നു. വൈപ്പിനില്‍ നിന്ന് ഫോർട്ട് കൊച്ചിയിലേക്ക് രണ്ട് മണിക്ക് ശേഷം നാല് മണി വരെ മാത്രം വാഹനങ്ങള്‍ പ്രവേശനത്തിനുള്ള അനുമതി ലഭ്യമാകും. കൂടാതെ, വൈകുന്നേരം ഏഴ് മണി കഴിഞ്ഞ് ആളുകളെ ഫോർട്ട് കൊച്ചിയിലേക്ക് പ്രവേശിപ്പിക്കില്ല. അതിനാല്‍ പൊതു സുരക്ഷയും തിരക്കു നിയന്ത്രണവും കാര്യക്ഷമമാക്കാൻ പൊതുജനങ്ങള്‍ക്ക് പരമാവധി പബ്ലിക് ട്രാൻസ്പോർട്ടിന്റെ ഉപയോഗം നിർദ്ദേശിച്ചിട്ടുണ്ട്.