ദളിത് ക്രൈസ്തവർക്ക് പ്രത്യേക സംവരണം പ്രഖ്യാപിക്കാത്തപക്ഷം തിരഞ്ഞെടുപ്പുകളിൽ നിലപാട് സ്വീകരിക്കുമെന്ന് സി എസ് ഡി എസ് സംസ്‌ഥാന പ്രസിഡന്റ്‌ കെ കെ സുരേഷ്. 

സി എസ് ഡി എസ് സംസ്‌ഥാന കമ്മിറ്റിയുടെ നേതൃത്വത്തിൽ കട്ടപ്പനയിൽ ദളിത് ക്രൈസ്തവ കോൺക്ലേവും പ്രകടനവും പൊതുസമ്മേളനവും നടത്തി.

 കേരളത്തിലെ മുപ്പത് ലക്ഷത്തോളം വരുന്ന ദളിത് ക്രൈസ്തവർക്ക് തൊഴിൽ വിദ്യാഭ്യാസ രാഷ്ട്രീയ അധികാര മേഖലകളിൽ പ്രത്യേക സംവരണം പ്രഖ്യാപിക്കാത്ത പക്ഷം അടിസ്‌ഥാന ജനത തിരഞ്ഞെടുപ്പിൽ ശക്തമായ നിലപാട് സ്വീകരിക്കുമെന്ന് ചേരമസാംബവ ഡെവലപ്പ്മെന്റ് സൊസൈറ്റി സംസ്‌ഥാന പ്രസിഡന്റ്‌ കെ കെ സുരേഷ്. നാളുകളായി നടന്നു വരുന്ന ദളിത് ക്രൈസ്തവ സമരങ്ങളെ പരിഗണിയ്ക്കുവാൻ എല്ലാ മുന്നണികളും പരാജയപ്പെട്ടു. മുന്നണികൾക്ക് വോട്ടുകൊണ്ട് മറുപടി പറയുവാൻ അടിസ്‌ഥാന ജനത രാഷ്ട്രീയ തീരുമാനം കൈക്കൊള്ളുമെന്നും കെ കെ സുരേഷ് പറഞ്ഞു. ഭരണഘടന ദിനത്തിൽ കട്ടപ്പന മുനിസിപ്പൽ സ്റ്റേഡിയത്തിൽ സി എസ് ഡി എസ് നടത്തിയ പൊതുസമ്മേളനം ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം. സംസ്‌ഥാന കമ്മിറ്റി മോബിൻ ജോണി അധ്യക്ഷത വഹിച്ചു. ദളിത് ക്രൈസ്തവർക്ക് പ്രത്യേക സംവരണം പ്രഖ്യാപിക്കണമെന്നും പ്രത്യേകമായി കോർപ്പറേഷൻ രൂപീകരിക്കണമെന്നും പട്ടികവിഭാഗങ്ങളുടെ ഭൂമി, ഗ്രാന്റ് തുടങ്ങിയ വിഷയങ്ങളിൽ പരിഹാരം കാണണമെന്നും കെ കെ സുരേഷ് ആവശ്യപ്പെട്ടു.

രാവിലെ കട്ടപ്പന ഏദൻ ഓഡിറ്റോറിയത്തിൽ ദളിത്‌ ക്രൈസ്തവ സഭ നേതാക്കളും സംഘടന ഭാരവാഹികളും സി എസ് ഡി എസ് സംസ്‌ഥാന നേതാക്കളും പങ്കെടുത്ത ദളിത് ക്രിസ്ത്യൻ കോൺക്ലേവ് സുവിശേഷകൻ പാസ്റ്റർ അനിൽ കൊടിത്തോട്ടം ഉദ്ഘാടനം ചെയ്തു.

തുടർന്ന് കട്ടപ്പന നഗരത്തിൽ നൂറുകണക്കിന് സി എസ് ഡി എസ് പ്രവർത്തകർ പങ്കെടുത്ത പ്രകടനവും നടത്തി. സ്ത്രീകളും യുവജനങ്ങളും അടക്കം പങ്കെടുത്ത പ്രകടനം സംഘടനയുടെ ശക്തിപ്രകടനമായി മാറി.

പൊതുസമ്മേളനത്തിൽ സംസ്‌ഥാന ജനറൽ സെക്രട്ടറി സുനിൽ കെ തങ്കപ്പൻ, ട്രഷറർ പ്രവീൺ ജെയിംസ്, സെക്രട്ടറി ലീലാമ്മ ബെന്നി, ഇടുക്കി ജില്ലയിലെ വിവിധ താലൂക്ക് കമ്മിറ്റി നേതാക്കളായ ബിജു പൂവത്താനി,കെ വി പ്രസാദ്, ബിനു ചാക്കോ, എം എം സുരേഷ്, സെബാസ്റ്റ്യൻ പി ജെ, സണ്ണി തോമസ്, മധു പാലത്തിങ്കൽ, ഷാജി കട്ടച്ചിറ, തോമസ് പി ജെ, ജോൺസൻ ജോസഫ്, സന്തോഷ്‌ പുഷ്പഗിരി, ശ്രീലാൽ ടി പി ബാബു കട്ടപ്പന തുടങ്ങിയവർ പ്രസംഗിച്ചു