മൂന്നാർ പഞ്ചായത്ത് തലയാർ എസ്റ്റേറ്റിൽ പാമ്പൻമല ഡിവിഷനിൽ പട്ടാപകൽ പുലി പശുവിനെ ആക്രമിച്ചു കൊന്നു. പാമ്പൻ മല ഡിവിഷനിലെ 29-ാം നമ്പർ ഫീൽഡിലാണ് പുലിയുടെ ആക്രമണം ഉണ്ടായത്. സംഭവം നടക്കുന്നതിന് 50 മീറ്റർ അകലെ നിരവധി സ്ത്രീകൾ തേയിലകൊളുന്ത് എടുക്കുന്നുണ്ടായിരുന്നു.

തീറ്റയ്ക്കായി വിട്ടിരിരുന്ന പശുക്കൾ മേയുന്നത് കണ്ടിരുന്നതായി തൊഴിലാളികൾ പറഞ്ഞു.പെട്ടെന്ന് പശുക്കൾ ഓടി പോകുന്നത് കണ്ട തൊഴിലാളികൾ നടത്തിയ അന്വേഷണത്തിലാണ് പിൻഭാഗം ഭക്ഷിച്ച നിലയിൽ പശുവിൻ്റെ ജഡം കണ്ടെത്തിയത്.

മുറിവിൽ നിന്നും രക്തം ഒലിക്കുന്നുണ്ടായിരുന്നു.കഴിഞ്ഞ ഒരാഴ്ചയ്ക്കുള്ളിൽ വിനായകൻ്റെ മൂന്ന് പശുക്കളും പ്രേമയുടെ ഒരു പശുവുമാണ് പുലിയുടെ ആക്രമണത്തിൽ കൊല്ലപ്പെട്ടത്. പുലിയുടെ ആക്രമണം നടന്ന സ്ഥലത്ത് നിന്നും അര കിലോമീറ്റർ അകലെയാണ് പാമ്പൻ മലയിലെ തൊഴിലാളി ലയങ്ങൾ. ലയങ്ങൾക്ക് ചുറ്റുമാണ് തേയിലത്തോട്ടം സ്ഥിതി ചെയ്യുന്നത്. പലചരക്ക് അടക്കമുള്ള അവശ്യസാധനങ്ങൾ വാങ്ങുന്നതിനും സ്കൂൾ, കോളേജ് ആശുപത്രി, ഓഫീസുകൾ എന്നിവിടങ്ങളിൽ പോകുന്നതും ഈ തേയിലത്തോട്ടം വഴിയാണ്. പകൽ സമയത്ത് പോലും പുലിയുടെ ആക്രമണം ഉണ്ടായത് തൊഴിലാളികളെ ആശങ്കയിലാഴ്ത്തിയിരിക്കുകയാണ്. പാമ്പൻ മല, ചട്ട മൂന്നാർ, തലയാർ മേഖലകളിൽ 100 ലധികം പശുക്കൾ പുലിയുടെയും കടുവയുടെയും ആക്രമണത്തിന് ഇരയായിട്ടുണ്ട്.