.jpg)
.jpg)
.jpg)
മിനി സിവില്‍ സ്റ്റേഷന്‍ നിര്‍മ്മാണത്തിന് 10 കോടി അനുവദിച്ചു: മന്ത്രി റോഷി അഗസ്റ്റിന്‍.- സാങ്കേതിക അനുമതി ലഭ്യമാകുന്ന മുറയ്ക്ക് ടെന്‍ഡര്‍ പൂര്‍ത്തിയാക്കി നിര്‍മാണം തുടങ്ങും
ചെറുതോണി: ചെറുതോണി ടൗണ്‍ ഹാളിന് സമീപം മിനി സിവില്‍ സ്റ്റേഷന്റെ ആദ്യ ഘട്ട നിര്‍മ്മാണത്തിന് 10 കോടി രൂപ അനുവദിച്ച് ഉത്തരവായതായി മന്ത്രി റോഷി അഗസ്റ്റിന്‍ അറിയിച്ചു. ജില്ലാ ആസ്ഥാനത്ത് പലയിടത്തായി പ്രവര്‍ത്തിക്കുന്ന വിവിധ ഓഫീസുകള്‍ ഒരു കുടകീഴിലേക്ക് മാറ്റുന്ന ലക്ഷ്യത്തോടെയാണ് മിനി സിവില്‍ സ്റ്റേഷന്‍ നിര്‍മ്മിക്കുക. ഇതിനായി 3 ഏക്കര്‍ സ്ഥലം കൈമാറിയിരുന്നു.
കെട്ടിട നിര്‍മ്മാണത്തിനുള്ള സാങ്കേതിക അനുമതി ലഭ്യമാക്കുന്നതിനുള്ള നടപടികള്‍ സ്വീകരിച്ചു വരികയാണ്. സാങ്കേതിക അനുമതി കൂടി ലഭ്യമാക്കുന്നതോടെ ടെന്‍ഡര്‍ നടപടികള്‍ പൂര്‍ത്തിയാക്കി നിര്‍മ്മാണ പ്രവര്‍ത്തനങ്ങള്‍ ആരംഭിക്കാന്‍ കഴിയും. 4460 ചതുരശ്ര മീറ്റര്‍ വിസ്തീര്‍ണം ഉള്ള കെട്ടിടം ആണ് മിനി സിവില്‍ സ്റ്റേഷനുവേണ്ടി രൂപകല്‍പ്പന ചെയ്തിരിക്കുന്നത്. 3 ബ്ലോക്കുകളായി ആണ് നിര്‍മ്മാണം പൂര്‍ത്തിയാക്കുക.ഇതില്‍ ആദ്യത്തെ ബ്ലോക്ക് ആണ് ഇപ്പോള്‍ നിര്‍മ്മിക്കുക 1600 ചതുരശ്ര മീറ്റര്‍ വിസ്തീര്‍ണം ആണ് 4 നിലകളില്‍ ആയി വിഭാവനം ചെയ്തിരിക്കുന്ന ഈ ബ്ലോക്കിന് ഉള്ളത്.
.jpeg)
നിലവില്‍ നിര്‍മ്മിക്കുന്ന ബ്ലോക്കിന്റെ താഴത്തെ നിലയില്‍ കാന്റീന്‍ , ഇലക്ട്രിക്കല്‍ റൂം, റെക്കോര്‍ഡ്സ് റൂം, സ്റ്റാഫ് ഡൈനിങ്ങ്, കിച്ചന്‍ എന്നിവയും ഒന്ന് രണ്ട് നിലകളില്‍ താലൂക്ക് ഓഫീസും മൂന്നാം നിലയില്‍ മെഷീന്‍ റൂം ,ലോബി ,സ്റ്റോര്‍ ,സ്റ്റെയര്‍ റൂം എന്നിവയുമാണ് വിഭാവനം ചെയ്തിരിക്കുന്നത്. ടെന്‍ഡര്‍ നടപടികള്‍ പൂര്‍ത്തീകരിച്ച് നിര്‍മ്മാണ പ്രവര്‍ത്തനങ്ങള്‍ ഉടന്‍ ആരംഭിക്കുമെന്ന് മന്ത്രി റോഷി അഗസ്റ്റിന്‍ അറിയിച്ചു.
നിര്‍മ്മാണം നടത്തേണ്ട മറ്റ് രണ്ട് ബ്ലോക്കുകള്‍ യഥാക്രമം 1590 ചതുരശ്ര മീറ്ററും 1290 ചതുരശ്ര മീറ്ററും വിസ്തീര്‍ണം ഉള്ളവയാണ്. ഈ ബ്ലോക്കുകളുടെ താഴത്തെ നില പൂര്‍ണമായും പാര്‍ക്കിംഗിനാകും വിനിയോഗിക്കുക. ഈ ബ്ലോക്കുകളുടെ ഒന്നാം നിലയില്‍ സബ് ട്രഷറിയാണ് ഉള്‍പ്പെടുത്തിയിരിക്കുന്നത്. ബാക്കി നിലകളിലായി താലൂക്ക് സപ്ലൈ ഓഫീസ് ,സോയില്‍ കോണ്‍സെര്‍വഷന്‍, ലീഗല്‍ മെട്രോളജി, ജോയിന്റ് റെജിസ്ട്രാര്‍ ഓഫീസുകളും ഉള്‍പ്പെടുത്തുന്നതിനാണ് ഉദേശിക്കുന്നതെന്ന് മന്ത്രി റോഷി അഗസ്റ്റിന്‍ അറിയിച്ചു.
