മൂന്നാർ ന്യൂനഗർ സ്വദേശി സൂര്യയെ കഴിഞ്ഞ ദിവസമായിരുന്നു വീടിനുള്ളിൽ മരിച്ച നിലയിൽ കണ്ടെത്തിയത്. സാഹചര്യ തെളിവുകളുടെയും പോസ്റ്റുമോർട്ടം റിപ്പോർട്ടിൻ്റെയും അടിസ്ഥാനത്തിൽ സൂര്യയുടെ മരണം കൊലപാതമെന്ന് സ്ഥിരീകരിക്കുകയാണ് പോലീസ്. സംഭവത്തിൽ സൂര്യയുടെ സഹോദരൻ വിഘ്നേഷിനെ പോലീസ് അറസ്‌റ്റ് ചെയ്‌തു.ഇതുമായി ബന്ധപ്പെട്ട് തുടരന്വേഷണം നടക്കുന്നുവെന്ന് പോലീസ് പറഞ്ഞു.

നിർമ്മാണക്കരാറുകാരൻ്റെ സഹായിയായിരുന്നു മരിച്ച സൂര്യ. കഴിഞ്ഞ ദിവസം രാവിലെ ജോലിക്കു ചെല്ലാതിരുന്നതിനെത്തുടർന്നു നടത്തിയ അന്വേഷണത്തിലാണു വീടിൻ്റെ വശത്തുള്ള മുറിയിൽ നിലത്ത് യുവാവിനെ മരിച്ചനിലയിൽ കണ്ടെത്തിയത്. യുവാവ് തൂങ്ങിമരിച്ചുവെന്നാണു ബന്ധുക്കൾ ആദ്യം പോലീസിനോട്  പറഞ്ഞത്. എന്നാൽ മൃതദേഹം നിലത്ത് കിടക്കുന്ന നിലയിലായിരുന്നു.

യുവാവിന്റെ കഴുത്തിൽ മുറിഞ്ഞ പാടുകളുണ്ടായിരുന്നു. സംഘർഷം നടന്നതിന്റെ സൂചനകളും പോലീസിന് ലഭിച്ചു. പോലീസും ഫൊറൻസിക് വിദഗ്‌ധരും വിരടയാള വിദഗ് ധരും സ്‌ഥലത്തെത്തി തെളിവുകൾ ശേഖരിച്ചിരുന്നു.ഇതിന് പിന്നാലെ പോസ്‌റ്റുമോർട്ട റിപ്പോർട്ട് കൂടി പുറത്തു വന്ന സാഹചര്യത്തിലാണ് സംഭവം കൊലപാതകമെന്നുറപ്പിച്ച് പോലീസ് ഒരാളെ അറസ്‌റ്റ് ചെയ്‌തിട്ടുള്ളത്.