ഞായറാഴ്ച ഉച്ച കഴിഞ്ഞാണ് നരിയംപാറ അമ്പലത്തിന് സമീപത്തും കൊറ്റംപടിക്ക് സമീപത്തുമായി മലയോര ഹൈവേയുടെ നിർമ്മാണത്തിന്റെ ഭാഗമായി കരാറുകാരൻ റോഡിൻറെ ഭാഗങ്ങൾ പൊളിച്ചു മാറ്റിയത്. ഈ പ്രവർത്തനങ്ങൾ നടത്തിയത് വൈകുന്നേരം ആയതിനാൽ ഈ പൊളിച്ചുമാറ്റിയ ഭാഗങ്ങൾ പൂർവസ്ഥിതിയിലാക്കാതെ കരാറുകാരൻ മടങ്ങി. ഇതോടെ ഇത് അറിയാതെ ഇതുവഴി വന്ന നിരവധി വാഹന യാത്രികർ ഈ കുഴിയിൽ പെട്ടു. 

 ഇരുചക്ര വാഹന യാത്രക്കാരുടെ വാഹനത്തിൻറെ നിയന്ത്രണം നഷ്ടമായി അപകടത്തിലും പെട്ടു. ഇതിൽ ഒരാൾ കട്ടപ്പന ആശുപത്രി ചികിത്സ തേടി വലിയ പ്രതിഷേധങ്ങൾ ഉയർന്നതോടെ രാത്രി കരാറുകാർ വന്ന് ഈ പൊളിച്ച ഭാഗത്ത് താൽക്കാലികമായി മുന്നറിയിപ്പ് സംവിധാനം ഒരുക്കി. എന്നാൽ ഇതും ഫലവത്തായില്ല. നാരിയംപാറയിൽ നിന്നും ഇറക്കം ഇറങ്ങി വരുന്ന വാഹനങ്ങൾ വേഗത്തിൽ വരുന്നതിനാൽ അടുത്തെത്തുമ്പോൾ മാത്രമേ ഈ അപകട മുന്നറിയിപ്പ് സംവിധാനം മനസ്സിലാകൂ.

അപ്പോഴേക്കും ബ്രേക്ക് ചവിട്ടിയാൽ പോലും വാഹനങ്ങൾ നിൽക്കാത്ത സാഹചര്യം ഉണ്ടാവുകയും ഈ കുഴിയിൽ പതിക്കുകയും ചെയ്യും. ഇന്ന് രാവിലെ ഈ കുഴിയിൽ പതിച്ച് ഒരു കാർ അപകടത്തിൽപ്പെട്ടു. കരാറുകാരുടെ ഈ നടപടിക്കെതിരെ വലിയ പ്രതിഷേധമാണ് ഉയരുന്നത്.

ഞായറാഴ്ച രാത്രിയിൽ നിരവധി വാഹനങ്ങളാണ് ഈ കുഴിയിൽ പതിച്ചത്. അപ്രതീക്ഷിതമായി കുഴിയിൽ ചാടുന്നതോടെ വാഹനത്തിനുള്ള ആളുകൾക്ക് വലിയ ആഘാതമാണ് ഏറ്റത്. സമൂഹത്തിൻറെ വിവിധ കോണുകളിൽ നിന്ന് ഈ നടപടിയിൽ വലിയ പ്രതിഷേധമാണ് ഉയർന്നതും. പ്രതിഷേധം ശക്തമായതോടെ ഇന്ന് ഈ പൊളിച്ചിട്ട് ഭാഗം പൂർവസ്ഥിതിയിൽ ആക്കാനുള്ള ശ്രമത്തിലാണ് കരാറുകാരും.