കട്ടപ്പന കല്ല്യാണത്തണ്ട് ഭൂവിഷയവുമായി ബന്ധപ്പെട്ട് കോൺഗ്രസിന്റെ നേതൃത്വത്തിൽ കട്ടപ്പന വില്ലേജ് ഓഫീസ് പടിക്കലേയ്ക്ക് ബഹുജന മാർച്ച് സംഘടിപ്പിച്ചു. മുൻ എം എൽ എ ഇ എം ആഗസ്തി സമരം ഉദ്ഘാടനം ചെയ്തു.കുടിയിറക്കുനീക്കം അവസാനിപ്പിക്കുക, കൃഷിഭൂമിക്ക് പട്ടയം ലഭ്യമാക്കുക തുടങ്ങിയ ആവശ്യങ്ങളുന്നയിച്ച് ജനകീയ സമരസമിതിയുടെ നേതൃത്വത്തിലുള്ള ആദ്യ സമരമാണ് ഇന്ന് നടന്നത്.

1970 മുതൽ മേഖലയിൽ സ്ഥിരതാമസമാക്കിയിട്ടുള്ള 43 കുടുംബങ്ങളെ കുടിയിറക്കാനുള്ള റവന്യൂ വകുപ്പിന്റെ നീക്കത്തിനെതിരെയാണ് സമരം. പ്രശ്നപരിഹാരശ്രമത്തിൻ്റെ ഭാഗമായി മുഖ്യമന്ത്രിക്ക് ഉൾപ്പെടെ നിവേദനം നൽകാനും മറ്റ് നിയമ നടപടികൾക്കായി മേഖലയിലെ കുടുംബങ്ങളുടെ ആധികാരിക രേഖയുടെ പകർപ്പുകൾ സമര സമിതിയുടെ നേതൃത്വത്തിൽ ശേഖരിക്കുകയും ചെയ്തു.

കോൺഗ്രസ് കട്ടപ്പന മണ്ഡലം പ്രസിഡന്റ് സിജു ചക്കുംമൂട്ടിൽ 30 ഓളം കുടുംബങ്ങളുടെ രേഖകൾ കർഷക കോൺഗ്രസ് സംസ്ഥാന ജനറൽ സെക്രട്ടറി ജോസ് മുത്തനാട്ടിന് കൈമാറി. തുടർന്ന് കർഷക കോൺഗ്രസ് ഇടുക്കി നിയോജക മണ്ഡലം കമ്മിറ്റിയുടെ നേതൃത്വത്തിൽ ഇടുക്കി താലൂക്ക് ഓഫീസിലേക്ക് ആഗസ്റ്റ് 30 ന് കർഷക മാർച്ചും കൂട്ടധർണയും നടത്താനാണ്  തീരുമാനം.