സിപിഐഎം ജില്ലാ സമ്മേളനത്തിന് മുന്നോടിയായിട്ടുള്ള   കട്ടപ്പന ഏരിയ കമ്മിറ്റിയിലെ സ്മൃതിദീപ സംഗമം ഞായറാഴ്ച നടക്കും. ഏരിയ കമ്മിറ്റിയിലെ പാര്‍ടിയുടെ വിവിധ ഘടകങ്ങളില്‍ പ്രവര്‍ത്തിച്ചിരുന്ന, അന്തരിച്ച 30ലേറെ പ്രവര്‍ത്തകരുടെ വീടുകളില്‍നിന്ന് കുടുംബാംഗങ്ങള്‍ തെളിച്ചു കൈമാറുന്ന ദീപങ്ങള്‍ ജാഥകളായി പകല്‍ 12.30 ഓടെ കട്ടപ്പന ഇടുക്കിക്കവലയിലെത്തും.

 ജില്ലാ കമ്മിറ്റിയംഗം വി ആര്‍ സജി, ഏരിയ സെക്രട്ടറി മാത്യു ജോര്‍ജ്, ഏരിയ കമ്മിറ്റിയംഗങ്ങള്‍ എന്നിവര്‍ ചേര്‍ന്ന് സ്വീകരിക്കും. തുടര്‍ന്ന് ജാഥയായി രക്തസാക്ഷി കെ കെ വിനോദിന്റെ ഇരട്ടയാറിലെ സ്മൃതിമണ്ഡപത്തില്‍ എത്തിച്ചേര്‍ന്ന് ദീപശിഖാ പ്രയാണത്തില്‍ അണിചേരും.സിപിഐ എം ജില്ലാ സമ്മേളന നഗറിലേക്കുള്ള ദീപശിഖാ പ്രയാണം ജില്ലാ സെക്രട്ടറി സി വി വര്‍ഗീസ് ഇരട്ടയാറ്റിൽ ഉദ്ഘാടനം ചെയ്യും.

ജില്ലാ സെക്രട്ടറിയറ്റംഗം റോമിയോ സെബാസ്റ്റ്യന്‍ ക്യാപ്റ്റനായ പ്രയാണത്തില്‍ ജില്ലാ സെക്രട്ടറിയറ്റംഗം എം ജെ മാത്യു വൈസ് ക്യാപ്റ്റനും ജില്ലാ കമ്മിറ്റിയംഗം വി ആര്‍ സജി മാനേജരും ഏരിയ സെക്രട്ടറിമാരായ പി ബി സബീഷ്, മാത്യു ജോര്‍ജ് എന്നിവര്‍ അംഗങ്ങളുമാണ്. വിനോദിന്റെ അമ്മ വള്ളിയമ്മ ദീപശിഖ തെളിയിക്കും. തുടര്‍ന്ന് പ്രയാണമായി വൈകിട്ട് ഇടുക്കിയിലെ ധീരജ് രാജേന്ദ്രന്‍ സ്മൃതി കുടീരത്തില്‍ എത്തിച്ചേരും. തിങ്കള്‍ രാവിലെ പ്രയാണം ആരംഭിച്ച് തൊടുപുഴയിലെ സമ്മേളന നഗരിയിൽ എത്തും .