മൂവാറ്റുപുഴ കോതമംഗലം നിവാസികളുടെ പതിറ്റാണ്ടുകളായുള്ള ആവശ്യമായ കടാതി-കാരക്കുന്നം, മാതിരപ്പിള്ളി-കോഴിപ്പിള്ളി ബൈപാസുകൾക്ക് കേന്ദ്ര ഉപരിതല ഗതാഗത മന്ത്രാലയം ഭൂമി ഏറ്റെടുക്കുന്നതിനുള്ള 3(a) ഗസറ്റ് നോട്ടിഫിക്കേഷൻ പ്രസിദ്ധീകരിച്ചതായി ഡീൻ കുര്യാക്കോസ് എം.പി. അറിയിച്ചു.  2 ബൈപാസുകൾക്കുമായി സ്ഥലമേറ്റെടുപ്പിനായി 1307 കോടി ഉൾപ്പെടെ 1720 കോടി രൂപ  2023-24 വാർഷിക പദ്ധതിയിൽപെടുത്തി 13.09.2023 ന് കേന്ദ്ര ഉപരിതല ഗതാഗത മന്ത്രാലയം അംഗീകാരം നൽകിയത്. . 30 മീറ്റർ വീതിയിൽ 4 ലൈൻ പേവ്ഡ് ഷോൾഡർ രീതിയിൽ ആധുനിക നിലവാരത്തിലാണ് നിർമ്മാണം.

ഹൈവേ എഞ്ചിനീയറിങ് കൺസൾട്ടൻസിയാണ് ഡി.പി.ആർ. തയ്യാറാക്കിയിരിക്കുന്നത്. ഇനി ഈ സാമ്പത്തിക വർഷം തന്നെ സ്ഥലമേറ്റെടുക്കൽ, നഷ്ടപരിഹാരവിതരണം തുടങ്ങിയ നടപടിക്രമങ്ങൾ പൂർത്തിയാക്കി  നിർമാണം ആരംഭിക്കാൻ കഴിയുമെന്നാണ് പ്രതീക്ഷിക്കുന്നതെന്ന് എം.പി. പറഞ്ഞു. സ്പെഷ്യൽ ഡെപ്യുട്ടി കളക്ടർ എൽഎ.എൻ.എച്ച് എറണാകുളം (CALA-2) നെയാണ് സ്ഥനമേറ്റെടുപ്പിന് ചുമതലപ്പെടുത്തിയിരിക്കുന്നത്. മൂവാറ്റുപുഴ താലൂക്കിലെ വാളകം, മുളവൂർ, ഏനാനല്ലൂർ, മൂവാറ്റുപുഴ, മാറാടി, വെള്ളൂർക്കുന്നം, വില്ലേജുകളും കോതമംഗലം താലൂക്കിലെ പോത്താനിക്കാട്, വാരപ്പെട്ടി, കോതമംഗലം എന്നീ വില്ലേജുകളിലുടെയാണ് ബൈപ്പാസ് അലൈൻമെൻറ് നിശ്ചയിച്ചിരിക്കുന്നത്.

കടാതി മുതൽ കാരക്കുന്നം വരെ  6 കി.മി നീളത്തിൽ നിർമ്മിക്കുന്ന മൂവാറ്റുപുഴ ബൈപ്പാസിന് ഭൂമി ഏറ്റെടുക്കലിന് 543 കോടിയും സിവിൽ വർക്കുകൾക്കായി  217 കോടിയും ഉൾപ്പെടെ ആകെ 760 കോടി രൂപയും മാതിരപ്പിള്ളി മുതൽ കോഴിപ്പിള്ളി വരെ  5 കി.മി  നീളത്തിൽ നിർമ്മിക്കുന്ന കോതമംഗലം ബൈപ്പാസിന് സ്ഥലം ഏറ്റെടുക്കലിന് 764 കോടി സിവിൽ വർക്കുകൾക്കായി 196 കോടിയും ഉൾപ്പെടെ 960 കോടി രൂപയുടെ പദ്ധതിക്കാണ്  ഡി.പി.ആർ തയ്യാറാക്കിയിരിക്കുന്നതെന്നും എം.പി. പറഞ്ഞു.